Sekretari i Përgjithshëm i Partisë Demokratike, Flamur Noka, lëshoi akuza të ashpra ndaj eksponentëve të njohur të botës së krimit, duke përmendur me emër Safet Bajrin dhe Suel Çelën si pjesë e një skeme për blerje votash në mbështetje të Partisë Socialiste. Në një intervistë për “Off the Record” në A2 CNN, Noka paralajmëroi se “këta minj që ndjejnë tërmetin të parët” do të përfundojnë pas hekurave dhe se opozita nuk do të bëjë asnjëherë paqe me ta.
Ai shtoi se fitorja e opozitës është e sigurt dhe se pas saj do të vijë konsolidimi i qeverisë së Sali Berishës. Noka theksoi se ardhja në Shqipëri e strategut amerikan La Civita është një mesazh i qartë se SHBA nuk mbështet krimin, por qëndron në krah të opozitës.
“Amerika nuk është me kokainën, inceneratorët dhe Portin e Durrësit, por me Sali Berishën”, tha Noka.
“Kontrata me strategun e fitores së Trump është firmosur nga unë dhe zgjat deri në fund të vitit.”
“La Civita ka ardhur për të çmontuar kukullën e Sorosit dhe për të ndërtuar fitoren,” përfundoi Noka.
