Asociacioni i Gazetarëve të Shqipërisë (AGSH) ka reaguar pas deklaratave të ish-drejtueses së Shërbimit Informativ të Shtetit, Vlora Hyseni, ndaj gazetares Klodiana Lala.
Përmes një reagimi publik, AGSH dënon me termat më të ashpër atë që e cilëson si shantazh dhe sulm ndaj gazetares, duke theksuar se presioni ndaj përfaqësuesve të medias nuk mund të tolerohet.
“Çdo i dyshuar i drejtësisë duhet të japë llogari vetëm përpara drejtësisë, ndërsa shantazhet ndaj gazetarëve nuk mund të tolerohen”, thuhet në reagimin e Asociacionit të Gazetarëve të Shqipërisë.
AGSH i bën gjithashtu thirrje Hysenit që të tërheqë menjëherë deklaratat e bëra ndaj gazetares Klodiana Lala.
Njëkohësisht, Asociacioni i kërkon Strukturës së Posaçme Kundër Korrupsionit dhe Krimit të Organizuar (SPAK) që ta trajtojë me seriozitet episodin.
“AGSH i bën thirrje zonjës Hyseni që të tërheqë menjëherë deklaratat e saj, ndërsa e nxisim Strukturën e Posaçme që të shikojë me seriozitet këtë episod shantazhi nga ana e saj ndaj një gazetareje”, vijon reagimi.
Deklarata e AGSH-së vjen pas përplasjes së Hysenit me gazetaren Klodiana Lala, teksa ish-drejtuesja e SHISH po përballej me pyetjet e gazetarëve lidhur me çështjen për të cilën po hetohet nga SPAK.
Sipas qëndrimit të AGSH-së, pavarësisht pozitës së një personi përballë drejtësisë, sulmet dhe deklaratat me karakter shantazhues ndaj gazetarëve që ushtrojnë detyrën e tyre nuk duhet të tolerohen.
