Policia e Tiranës ka goditur një tjetër call center të dyshuar për mashtrim, duke arrestuar katër persona dhe proceduar penalisht 49 punonjës. Operacioni i koduar “Hold on” u zhvillua në një ambient në bulevardin “Gjergj Fishta”, ku sipas hetimeve ushtrohej veprimtari mashtruese ndaj shtetasve të huaj.
Në pranga kanë përfunduar Ernest Kurti, Amanti Jeshili, Eljo Dyrmishi dhe Marjo Myftari, të cilët dyshohet se administronin dhe drejtonin aktivitetin e call center-it.
Gjatë kontrollit në ambientet e subjektit, policia sekuestroi 107 pajisje elektronike që dyshohet se përdoreshin për kryerjen e mashtrimit, si dhe materiale të tjera që do t’i shërbejnë hetimit.
Sipas njoftimit zyrtar të Policisë së Shtetit, në kuadër të operacionit u arrestuan në flagrancë shtetasit E. K., 28 vjeç, A. J., 21 vjeç, E. D., 21 vjeç dhe M. M., 19 vjeç, të cilët dyshohet se administronin këtë veprimtari dhe drejtonin grupet e punonjësve.
Po ashtu, në ambientet e call center-it u konstatuan duke punuar 49 persona të tjerë, ndaj të cilëve ka nisur procedimi penal në gjendje të lirë.
Hetimet vijojnë për dokumentimin e plotë të veprimtarisë së dyshuar kriminale, identifikimin e personave të tjerë të përfshirë dhe përcaktimin e dëmit të shkaktuar nga kjo skemë mashtrimi.
