Gardhi me tela me gjemba, i cili është kthyer në simbol të revoltës popullore që prej 11 ditësh po shoqërohet me protesta dhe thirrje për dorëheqjen e kryeministrit dhe qeverisë, duket se është vendosur edhe në zonën e Rrjollit në Velipojë.
Banorët e zonës kanë paralajmëruar zhvillimin e një proteste kombëtare ditën e shtunë, pas muajsh tubimesh dhe kundërshtimesh nga qytetarët që pretendojnë pronësinë mbi këto toka. Në reagimet e tyre në rrjetet sociale, banorët e Baks-Rrjollit shprehen se gardhi me tela me gjemba nuk rrethon thjesht një sipërfaqe toke që ata e konsiderojnë të tjetërsuar, por simbolizon edhe dinjitetin e tyre të nëpërkëmbur.
Protestuesit kanë vendosur ta zhvendosin kauzën e tyre nga Velipoja drejt Tiranës, duke iu bashkuar tubimit masiv që prej më shumë se dhjetë ditësh po zhvillohet në kryeqytet.
