SPAK ka intensifikuar hetimet ndaj kryetarit të Bashkisë së Tiranës, Erion Veliaj. Hetuesit e BKH-së, me një vendim të Gjykatës së Posaçme në dorë, kanë ushtruar përsëri kontrolle në ambiente të cilat zotërohen nga familjarët e Veliajt.
Sipas një vendimi të gjyqtares Atalanta Zeqiraj, të firmosur më 14 janar, është urdhëruar kontrolli i apartamentit nr. 11/4 në Sky Tower, që besohet se përdoret nga Ajola Xoxa, bashkëshortja e kryebashkiakut. Apartamenti, sipas burimeve, është një kat mbi qendrën "Harabel", që zotërohet gjithashtu nga Xoxa. Hetuesit, në bazë të vendimit të gjykatës, kanë sekuestruar prej aty dokumente dhe pajisje elektronike, të cilat pritet të shqyrtohen ose të deshifrohen. Nuk është ende e qartë se si hetuesit kanë zbuluar dhe besojnë se apartamenti në fjalë përdorej nga Xoxa.
SPAK po heton kryebashkiakun Veliaj prej më shumë se dhjetë muajsh për dyshime mbi korrupsion, pastrim parash dhe fshehje pasurie. Hetuesit kanë kontrolluar më herët kompanitë e gruas dhe vëllait të tij, si dhe u kanë sekuestruar celularët. Veliaj, bashkë me bashkëshorten dhe persona të tjerë të besuar, ka dhënë dëshmi përpara prokurorëve të Posaçëm.
Me veprimet e fundit të BKH-së, duket se hetimet po afrohen drejt përfundimit. Në vijim, pritet të shihet qartë jo vetëm fati penal, por edhe ai politik i Erion Veliajt.
