Në kulmin e hetimeve të SPAK, Erjon Veliaj është nisur mëngjesin e sotëm në udhëtim jashtë vendit. Burimet thonë se destinacioni final i kryebashkiakut janë Shtetet e Bashkuara të Amerikës. Nuk dihet nëse Veliaj ka udhëtuar për arsye pune apo për festat e fundvitit.
Kryebashkiaku i Tiranës po hetohet nga SPAK për 4 vepra penale më të rëndat: korrupsion dhe pastrim parash. Të enjten ai u mor në pyetje nga Prokuroria e Posaçme për 5 orë.
Pasi u largua prej andej, deklaroi se ishte denoncuar nga një person anonim me emrin Nesti Angoni. Veliaj deklaroi se ky person nuk ekziston, pasi ka kërkuar në regjistrat e gjendjes civile.
Prokuroria e Posaçme iu përgjigj Veliajt teksa deklaroi se:
“Informacioni për referimin e veprës penale mori shkas nga një kallëzim i bërë nga shtetasi i vetëidentifikuar si N.A. Hetuesit e BKH-së, pas verifikimit të të dhënave dhe administrimit të provave dokumentare, referuan informacionin përkatës për veprën penale, mbi bazën e të cilit u regjistrua procedimi penal i mësipërm.
Deri në këtë fazë të hetimit paraprak, nga provat e grumbulluara, është arritur në konkluzionin se ekzistojnë të dhëna konkrete, të cilat lidhen jo vetëm me veprën penale të parashikuar nga neni 260 i Kodit Penal, por edhe me veprat penale:
Korrupsion aktiv i funksionarëve të lartë shtetërorë ose të zgjedhurve vendorë, i parashikuar nga neni 245;
Pastrimi i produkteve të veprës penale ose veprimtarisë kriminale, parashikuar nga neni 287/2 i Kodit Penal;
Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim, parashikuar nga neni 257/a, paragrafi 2 i Kodit Penal”, njoftoi prokuroria.
SPAK ka pyetur më herët bashkëshorten e z. Veliaj, si dhe ka ushtruar kontrolle në bizneset e Ajola Xoxës dhe Arbër Veliajt, duke iu sekuestruar celularët.
