“Ne i qëndrojmë pozicionit tonë të kahershëm se nuk angazhohemi me individë të përcaktuar për përfshirje në korrupsion madhor” - me këtë deklaratë e Ngarkuara me Punë e SHBA, Nancy Van Horn, i ka vënë “vulën” e mosbashkëpunimit me Sali Berishën për zgjedhjet e ardhshme. Gjatë ditëve të fundit, zonja Van Horn është takuar me faktorë të politikës opozitare, duke përfshirë dhe deputetë të PD zyrtare dhe partive të tjera opozitare. VNA mësoi se e dërguara me punë e SHBA në Tiranë është takuar me deputeten e PD Jorida Tabakun e shoqëruar me disa deputetë të tjerë të PD jo të afërt me kryetarin demokrat. Ndër të tjera gjatë takimit është diskutuar për zgjedhjet e ardhshme, përdorimin e pushtetit, ndikimin në procesin elektoral, ndikimin e krimit të organizuar, hapësirën e opozitës në kuvend, uzurpimin e çdo hapësire legjislative, pavarësinë e institucioneve, veçanërisht të drejtësisë, dhe nevojën për qeveri teknike.
Në një tjetër takim me Enkelejd Alibejan të partisë “Djathtas 1912”, Dashamir Shehin, Flutura Açkën dhe Agron Shehajt, veç problematikës zgjedhore, është folur dhe për reformën në drejtësi, institucionet e reja të dala prej saj dhe SPAK-un. SHBA kanë përshëndetur mbështetjen që kjo forcë politike i jep punës së bërë deri më tani nga Prokuroria e Posaçme. Ndërsa një shqetësim për këtë parti të re opozitare mbeten listat e mbyllura, një marrëveshje e arritur mes PS dhe PD. Një parlament i dalë me emrat e Ramës dhe Berishës është konsideruar një fluks deputetësh që rrezikojnë seriozisht punën e SPAK dhe për këtë shenjat kanë qenë të qarta.
Takimet me partitë opozitare, përjashtuar kryetarin e asaj që konsiderohet partia më e madhe e opozitës në Shqipëri, qartas dëshmojnë mosndryshimin e kursit ndaj shpalljes non grata të Sali Berishës në vitin 2021. Ndërkohë, jashtë spektrit të partive, në takime me ambasadën e SHBA ka qenë dhe Partia e Lirisë e drejtuar nga Ilir Meta.
