Autori i dyshuar i vrasjes së Martin Canit dhe plagosjes së Luis Mecjas, jashtë rrethimit të shkollës Fan Noli është pyetur të shtunën e 28 nëntorit për më shumë se 8 orë në ambjentet e prokurorisë së Tiranës. M.P, ka dhënë shpjegime të detajuara lidhur me ngjarjen, ndërsa është ballafaquar edhe me të mitur të tjerë të cilët kanë qenë të pranishëm në vendngjarje.
Prokuroria ndërkohë ka ballafaquar Luis Mecjan me djalin e tezes së tij, që ka qenë po ashtu i pranishëm në ngjarje. Në këtë ballafaqim kushëriri i Luisit ka folur vetëm për një autor të dyshuar, ndërsa ka pranuar se ka goditur me grusht të miturin, K.B, duke i shkaktuar një dëmtim në nofull.
M.P është lënë nën masën e arrestit me burg pasi dyshohet për akuzën e vrasjes për shkak të cilësive të vecanta të viktimës. Avokati i tij pritet ta ankimojë masën e sigurisë.
Martin Cani u godit me thikë për vdekje, ndërsa miku i tij Luis Mecja mbeti i plagosur, pas një sherri mes të miturish. Prokuroria është duke hetuar rreth ngjarjes, që ka shkaktuar tronditje të fortë në opinionin publik, ndërsa po zhvillohen protesta me moton “për shkolla të sigurta”.
