Adela Kondakçiu, e cila është në listën e personave të cilëve SPAK ka sekuestruar celularin në kuadër të hetimeve që po kryen ndaj kryebashkiakut të Tiranës, Erjon Veliaj, është një prej njerëzve të besuar të Ajola Xoxës. Kondakçiu, ekonomiste me profesion, ka përgatitur bilancet e kompanisë "Partners Law" të Ajola Xoxës, si dhe të kompanive të tjera në administrim të bashkëshortes së kryebashkiakut. Për më tepër, ajo është konsideruar si "truri" financiar i kompanive të Xoxës, të cilat u kontrolluan me urdhër të SPAK.
Komunikimet që Kondakçiu ka pasur me Xoxën, por edhe me persona të tjerë me interesa të drejtpërdrejta në Bashkinë e Tiranës, duket se konsiderohen si prova të rëndësishme nga SPAK, dhe për këtë arsye është bërë edhe sekuestrimi i telefonit të saj celular.
Përveç lidhjes me Xoxën, Kondakçiu ka lidhje indirekte edhe me zyrtarë të lartë në Bashkinë e Tiranës. Rezulton se ajo është ekonomiste e kompanisë ANK Architecture, me administrator Albana Koçollari, e cila është motra e Mirela Koçollarit, drejtoreshë në Bashkinë e Tiranës. ANK Architecture është kompania që shembi gjimnazin "Sami Frashëri".
