Më 16 dhjetor pritet që UEFA të zyrtarizojë kampionatin e përbashkët Europian “Euro 2027” për kombëtaret U-21 mes Shqipërisë dhe Serbisë. Temë shumë e diskutuar që ka ngjallur reagime të forta pasi ka lënduar shqiptarët në të dyja anët e kufirit.
Dikush mund të pyesë me të drejtë: ç’lidhje ka në këtë rast Adem Jashari?
Për t’i dhënë përgjigje kësaj pyetjeje mjafton të shohësh se prej muajit majit, kënga “Mora fjalë” e Shkurte Fejzës nuk luhet më në stadiumin shqiptar. Është kënga që i dedikohet heroit legjendar Adem Jashari, i vrarë së bashku me shumë familjarë të tij nga ushtria serbe. Vetë këngëtarja Fejza ka reaguar pak ditë më parë duke e cilësuar të pakuptimtë vendimin e FSHF-së. Më pas kanë reaguar edhe personalitete të futbollit, mes të cilëve ish-kapiteni legjendar, Lorik Cana. Ndërsa nga FSHF asnjë reagim.
Burime pranë institucionit të futbollit bëjnë me dije se koha kur kënga “Mora Fjalë” nuk është luajtur më në stadium përkon me kohën kur Shqipëria dhe Serbia e kishin arritur një marrëveshje për të organizuar Euro 2027 së bashku.
Pra, për ta “zbutur” disi situatën dhe për të mos i kujtuar publikut shqiptar në çdo ndeshje se po bashkëpunonim me Serbinë që masakroi mijëra shqiptarë përtej kufirit, përfshi edhe legjendarin Adem Jashari, FSHF me një urdhër të fshehtë u vendosi që të mos luhej më kjo këngë “për ca kohë”.
Tifo-grupet kryesore kanë reaguar deri tani vetëm në rrjetet sociale dhe me banderola sporadike kundër bashkëpunimit të FSHF-së me Serbinë, por vetëm kaq.
Ministria e Arsimit ka heshtur, federata e Kosovës hesht, ndërkohë që u është dhënë urdhër i prerë futbollistëve të kombëtares që të mos flasin asnjëherë për këtë temë.
Sa për kuriozitet, Kënga “Mora fjalë” në fakt u bë “hit” brenda dhomave të zhveshjes me Ylber Ramadanin dhe Mirlind Dakun që e këndonin gjatë grumbullimeve. Më pas kur nisën të vinin fitoret e mëdha, skuadra ia përcolli edhe publikut duke kënduar të përqafuar para tribunës.
Por festa mbaroi dhe tani FSHF duhet të bashkëpunojë me Serbinë, e cila me sa duket paska fuqinë që ti imponojë edhe këngët që luhen në stadiumet shqiptare.
