Me shtimin e numrit të protestave kundër qeverisë, edhe Policia e Shtetit ka intensifikuar procedimet penale ndaj pjesëmarrësve në tubime. Edhe gjatë ditës së sotme, policia njoftoi procedimin penal të 15 shtetasve, të dyshuar për organizim dhe pjesëmarrje në grumbullime e manifestime të paligjshme, prishje të rendit dhe qetësisë publike, si dhe pengim të qarkullimit të mjeteve të transportit.
Sipas njoftimit zyrtar të Policisë së Tiranës, procedimi erdhi pas tubimit të zhvilluar në kryeqytet, ku u proceduan shtetasit me iniciale A. G., G. P., A. T., D. G., L. K., E. S., A. K., E. L., V. D., G. K., A. P., Dh. C., A. B., L. G. dhe F. K.
Policia bën me dije se protesta ishte njoftuar të zhvillohej nga ora 19:00 deri në orën 22:00, në Sheshin “Skënderbej” dhe në bulevardin “Dëshmorët e Kombit”. Megjithatë, sipas autoriteteve, protestuesit kanë vijuar lëvizjen edhe në disa akse të tjera rrugore të Tiranës, përfshirë Rrugën e Elbasanit, zonën e 9-Katësheve, ish-Bllokun dhe segmente të Unazës, duke bllokuar qarkullimin e automjeteve.
Sipas policisë, lëvizjet janë kryer përtej orarit dhe perimetrit të miratuar zyrtarisht për zhvillimin e tubimit.
Në cilësinë e provës materiale janë sekuestruar një automjet dhe dy aparate celularë, ndërsa materialet procedurale i janë referuar Prokurorisë për veprime të mëtejshme.
