Gjykata e Lartë ka rrëzuar rekursin e ish-kryebashkiakut të Rrogozhinës, Edison Memolla, duke lënë në fuqi vendimin e Apelit të Posaçëm që e dënoi me 1 vit burg për korrupsion në zgjedhje. Vendimi u mor nga trupa gjykuese e përbërë nga Genti Shala, Ilir Panda dhe Albana Boksi.
Memolla, i cili ndodhet aktualisht në burgun e Rrogozhinës, u shpall fajtor nga dy shkallë gjykimi. Ai u vetëdorëzua në polici pas vendimit të Gjykatës së Posaçme të Apelit më 9 shkurt 2026 dhe më pas u transferua në institucionin e vuajtjes së dënimit.
Hetimet ndaj tij nisën pas publikimit të një audio-përgjimi, ku Memolla, në atë kohë kandidat për kryetar bashkie, dëgjohej duke ndërhyrë tek një punonjës i OSHEE-së për të mos i ndërprerë energjinë elektrike një abonenti debitor.
Në të njëjtën çështje u dënuan edhe Ndriçim Tafxhafa dhe Blerim Xhamani me nga 1 vit burg, ndërsa Isuf Tosku u dënua me 1 vit e 4 muaj burg, dënim që u konvertua në shërbim prove.
