Pas një ping-pongu nga njëra prokurori në tjetrën, është vendosur që rrëmbimi dhe zhdukja e Enton Janushit, alias Tauland Mazes, të hetohet nga organi i akuzës në Elbasan, për shkak se trupi i pajetë i tij u gjet në territorin e këtij qarku.
Enton Janushi, alias Tauland Maze, i cili jetonte prej shumë vitesh mes Tiranës, Holandës, Italisë dhe Belgjikës, u zhduk pa gjurmë që në janar 2015 në zonën afër Kopshtit Zoologjik në Tiranë.
Më vonë, familja bëri denoncim për zhdukjen e tij dhe ngriti pretendime se djali i tyre ishte rrëmbyer dhe vrarë.
Pas denoncimit, në Babje të Librazhdit u gjet i pajetë një trup dhe vetëm pas 11 vitesh u konfirmua, përmes krahasimit të ADN-së së prindërve, se i përkiste Enton Janushit.
Pas identifikimit të viktimës, për faktin se ai ishte rrëmbyer në Tiranë, Prokuroria e Elbasanit e kaloi dosjen në organin e akuzës në kryeqytet. Por Prokuroria e Tiranës refuzoi ta merrte rastin, duke pretenduar se nuk ishte kompetencë e saj, përderisa trupi i Enton Janushit ishte gjetur në territorin e qarkut të Elbasanit.
Prokuroria e Përgjithshme, pasi e shqyrtoi çështjen, vendosi ta kalojë dosjen në kompetencë të Prokurorisë së Elbasanit.
Trupi i pajetë i Enton Janushit është varrosur në varrezat publike në Librazhd, ndërsa deri më tani nuk është tërhequr nga familja, e cila kërkon ekspertizë private për të bërë identifikimin.
Enton Janushi dyshohet se u rrëmbye dhe u vra në shenjë hakmarrjeje për vrasjen barbare në Holandë të vëllezërve Florenc dhe Glevis Tola nga Elbasani. Në vrasjen e Janushit dyshohet të jetë i implikuar edhe një biznesmen i njohur nga Elbasani, i cili ndodhet i arrestuar me urdhër të SPAK si pjesë e një grupi të rrezikshëm kriminal.
