Partia Demokratike ka ndërmarrë hapa ligjorë kundër paketës së miratuar nga qeveria për protestat, duke kërkuar nga Gjykata Kushtetuese shfuqizimin e tre akteve që, sipas opozitës, cenojnë të drejtat dhe liritë themelore të qytetarëve.
Kreu i grupit parlamentar të PD-së, Gazment Bardhi, njoftoi këtë të premte se në Gjykatën Kushtetuese është depozituar kërkesa për shfuqizimin e dy akteve normative, nr. 5/2026 dhe nr. 6/2026, si dhe të Vendimit të Këshillit të Ministrave nr. 815/2026, të datës 28 tetor. Demokratët kërkojnë gjithashtu pezullimin e zbatimit të tyre deri në marrjen e një vendimi përfundimtar.
Sipas Bardhit, ndryshimet e miratuara nga ekzekutivi i japin Policisë së Shtetit kompetenca të zgjeruara për kufizimin e tubimeve, vendosjen e gjobave dhe marrjen e masave ndaj organizatorëve të protestave.
Një nga shqetësimet e ngritura nga opozita lidhet me mundësinë që Policia të kufizojë tubimet në zona të caktuara për periudha deri në 72 orë. Bardhi argumenton se një kompetencë e tillë mund të cenojë të drejtën kushtetuese të qytetarëve për t'u mbledhur dhe për të protestuar.
Kreu i grupit parlamentar demokrat kundërshtoi edhe dispozitat që parashikojnë përgjegjësi financiare për organizatorët e tubimeve në rastet kur pjesëmarrës të tjerë shkaktojnë dëme. Sipas tij, përgjegjësia duhet të jetë individuale dhe nuk mund t'u ngarkohet organizatorëve për veprime që nuk i kanë kryer apo nxitur.
Një tjetër pikë e kundërshtuar është krijimi i një regjistri të posaçëm për personat e përfshirë në procedime ose hetime penale që lidhen me protestat. Bardhi ngriti shqetësimin se ky mekanizëm mund të cenojë mbrojtjen e të dhënave personale dhe lirinë e lëvizjes së qytetarëve.
Përveç betejës në Gjykatën Kushtetuese, opozita ka kërkuar thirrjen në një seancë dëgjimore në Komisionin për të Drejtat e Njeriut të drejtorit të Përgjithshëm të Policisë së Shtetit, Skënder Hitaj.
Sipas Bardhit, drejtuesi i Policisë duhet të japë shpjegime për ndalimet, gjobat dhe përdorimin e forcës ndaj protestuesve gjatë javëve të fundit. Ai akuzoi strukturat policore për veprime që, sipas tij, kanë cenuar të drejtën e qytetarëve për të protestuar në mënyrë paqësore.
Në përfundim, Bardhi i bëri thirrje Gjykatës Kushtetuese ta shqyrtojë çështjen me urgjencë, ndërsa kërkoi edhe vëmendjen e partnerëve ndërkombëtarë ndaj masave të ndërmarra nga qeveria.
Tashmë pritet që Gjykata Kushtetuese të shqyrtojë kërkesën e demokratëve për pezullimin e akteve, përpara se të vendosë mbi kushtetutshmërinë e tyre.
