Në kulmin e tensioneve në Kuvend dhe në solidaritet me protestën e flamingove, opozita kërkoi në sallë zbatimin e nenit 66 të Rregullores së Kuvendit, i cili parashikon pezullimin ose mbylljen e seancës plenare kur cenohet seriozisht rendi i punimeve dhe krijohet kaos.
Neni 66 përcakton se në rast se në sallën e seancës plenare shkaktohet kaos dhe nuk merren parasysh thirrjet për ruajtjen e rendit, drejtuesi i seancës lë vendin e tij dhe seanca konsiderohet e pezulluar. Nëse pas rifillimit të saj kaosi vazhdon, drejtuesi mund ta pezullojë për një kohë të caktuar ose ta mbyllë atë.
Mbi bazën e këtij neni, më shumë se një herë opozita ka kërkuar ndërprerjen e seancave, duke argumentuar se në sallë është krijuar kaos. Pikërisht me këtë nen, kryetari i Grupit Parlamentar të PD-së, Gazment Bardhi, ka akuzuar Kryetarin e Kuvendit, Niko Peleshi, se në vend të pezullimit të seancës ka kaluar drejtpërdrejt në votimin e ligjeve, pa lejuar diskutimin mbi to.
Ky ishte gjithashtu një nga nenet që Gazment Bardhi përfshiu në shkresat e dërguara ambasadave, ku rendiste ato që ai i konsideronte shkelje të Rregullores së Kuvendit nga ana e Niko Peleshit. Deri më sot, nuk ka pasur një përgjigje publike nga Kryetari i Kuvendit lidhur me këto akuza.
Megjithatë, gjatë seancës së sotme, Niko Peleshi u dëgjua disa herë të deklaronte se Rregulloren e interpreton Kryetari i Kuvendit.
Por kjo nuk është plotësisht e saktë. Gjatë zhvillimit të seancës plenare, Rregulloren e interpreton drejtuesi i seancës, i cili mund të jetë edhe një nënkryetar i Kuvendit. Pra, Niko Peleshi e interpreton Rregulloren vetëm kur drejton seancën dhe jo kur ndodhet jashtë vendit, për shembull në një vizitë me Gazment Bardhin dhe Jorida Tabakun.
Pyetja që ngre opozita mbetet e njëjta: përse Niko Peleshi nuk po zbaton nenin 66 të Rregullores së Kuvendit?
Ashtu siç ka pretenduar, kërkuar dhe vazhdon të presë Gazment Bardhi.
