Sërish bllokim foltoreje!
Por rregullorja e Kuvendit tani është ajo që shkroi Niko Peleshi. Kujtojmë se PD ankimoi në Gjykatën Kushtetuese ndryshimet e rregullores të miratuara në nisje të legjislaturës. Me atë ankimim, PD kërkonte rrëzimin, mes të tjerash, të neneve që sajonin një komision në pronësi të Fatmir Xhafajt.
Gjykata Kushtetuese i rrëzoi këto ndryshime dhe tema e rregullores u rikthye për shqyrtim në Kuvendin e drejtuar nga Niko Peleshi. Kujtojmë se Kryetari i Kuvendit nuk është thjesht drejtues i seancës plenare. Këtë rol e ushtron sa herë Kuvendi mblidhet. Por mbi të gjitha, ai është drejtuesi i institucionit që përfaqëson organin më të lartë të pushtetit ligjvënës.
Pas rrëzimit nga Gjykata Kushtetuese të komisionit Xhafaj, Kuvendi i drejtuar nga Niko Peleshi rifuti në shqyrtim ndryshimet e rregullores. Me negociimin personal të Kryetarit të Kuvendit, pozicioni privat i Fatmir Xhafajt u rikthye edhe më i fuqishëm se më parë. Sepse neni i rrëzuar nga Gjykata Kushtetuese për krijimin e komisionit privat të Xhafajt u rikthye i shoqëruar edhe me një tjetër, i cili nuk kishte qenë fare pjesë e paketës fillestare të ndryshimeve në nisje të legjislaturës.
Një nen me të cilin komisioni privat i Fatmir Xhafajt shndërrohet tashmë në babain e të gjitha komisioneve të tjera, duke përçudnuar të gjithë skemën e funksionimit të komisioneve parlamentare. Gjithçka me votat edhe të opozitës.
Me mbi 30 amendamente, tashmë çdo rrëmujë në Kuvend, e cila nuk disiplinohet dot nga rregullorja, nuk mund t’i faturohet askujt tjetër veç atyre që e shkruan, e negociuan dhe e votuan.
Dhe meqë pazari mes Kryetarit të Kuvendit, Niko Peleshi, dhe kryetarit të Grupit Parlamentar të PD-së, Gazment Bardhi, rezultoi i mjaftueshëm për të rikthyer edhe më të fuqishëm komisionin e Fatmir Xhafajt, nuk ka më asnjë kuptim që përgjegjësia për kaosin e sotëm të kërkohet diku tjetër. Rregullorja është e Nikos, marrëveshja është e Nikos me Gazment Bardhin dhe pasojat janë të atyre që vendosën ta shesin si reformë atë që në fund rezultoi thjesht një pazar.
