Kreu i Partisë Demokratike, Sali Berisha, akuzoi nga foltorja e Kuvendit ish-kreun e SPAK, Altin Dumani, se ka fshehur emrat e funksionarëve të lartë që, sipas tij, kanë qenë në Aruba, në ishullin ku autoritetet spanjolle dokumentuan takimin mes Artur Shehut, vëllezërve Osmani dhe personave të tjerë të dyshuar për trafik droge.
Berisha deklaroi se Dumani ka fshehur emrat e ish-sekretarit të përgjithshëm të Kryeministrisë, Engjëll Agaçi, të Olsi Ramës, vëllait të kryeministrit, si dhe të ish-ministrit Damian Gjiknuri.
I vetmi nga këta emra që ndodhej në sallën e Kuvendit, Damian Gjiknuri, kundërshtoi deklaratat e Berishës. Por kreu i PD iu përgjigj me ironi: “Edhe sikur të mos kesh qenë, të gjithë për ty flasin”, çka shkaktoi të qeshura në sallë.
Në fakt, dosja e SPAK mbi takimin në Aruba nuk përmban emra konkretë të funksionarëve, por referon informacionet e autoriteteve spanjolle, sipas të cilave, krahas trafikantëve shqiptarë, në takim kanë marrë pjesë edhe funksionarë shtetërorë që do të garantonin mbështetje politike për projektet e pastrimit të parave dhe investimet strategjike.
Megjithatë, ndërsa ka drejtuar gishtin nga Altin Dumani për mënyrën se si është hetuar dosja, Sali Berisha nuk ka përmendur asnjë nga emrat që SPAK ka identifikuar si të përfshirë në aktivitetin e trafikut të lëndëve narkotike. Në asnjë prej deklaratave të tij nuk janë përmendur Artur Shehu, Ilir Shtufi apo personat e tjerë të cilët figurojnë në hetimet e SPAK.
Për Berishën, problemi duket se nuk janë trafikantët e drogës të përmendur në dosje, por prokurori që ka zhvilluar hetimet.
