Deputeti i Partisë Demokratike, Klevis Balliu, u bëri thirrje qytetarëve protestues që të mblidhen te Parlamenti dhe të largojnë deputetët socialistë, duke thënë se më pas vetë protestuesit mund të vendosin për ndryshimet në Kodin Zgjedhor.
I ftuar në emisionin “Off the Record” në A2CNN, Balliu deklaroi se problem kryesor nuk është Kodi Zgjedhor, por, sipas tij, pabarazia në garën elektorale.
“Hajde t’i nxjerrim nga Parlamenti! Nesër është protesta, të vijnë aty në Parlament, t’i qisin përjashta dhe ne i ndihmojmë t’i nxjerrin përjashta, dhe le ta vendosin këta se çfarë Kodi Zgjedhor duan. Por s’është problem te Kodi Zgjedhor. I patë ato kullat? E patë që një person 29 vjeç kishte 135 milionë euro, me atë përballem në zgjedhje unë”, tha Balliu.
Deputeti demokrat shtoi se në protesta marrin pjesë qytetarë me bindje të ndryshme politike dhe se, sipas tij, opozita duhet të mbështesë protestuesit dhe kërkesat e tyre.
