Ndërsa protesta qytetare kundër qeverisë vazhdon prej ditësh në rrugët e Tiranës, deputeti i Partisë Demokratike, Belind Këlliçi, ka zgjedhur të angazhohet në një front tjetër. Nga Holanda, ku ndodhet për një vizitë zyrtare së bashku me kryetarin e Kuvendit, Niko Peleshi, ai ka reaguar në mbrojtje të qytetarëve që sipas tij po intimidohen në rrjetet sociale nga patronazhistët e Partisë Socialiste.
Këlliçi denoncoi publikisht një rast ku një qytetare pretendon se është kërcënuar pasi kishte komentuar në mënyrë kritike ndaj kryeministrit Edi Rama. Sipas deputetit demokrat, bëhet fjalë për një organizim të patronazhistëve që synon të frikësojë qytetarët dhe të kufizojë lirinë e shprehjes.
Ironia është se ndërsa protestuesit vazhdojnë të mbushin sheshet dhe të kërkojnë dorëheqjen e qeverisë, vetë Këlliçi vazhdon të mungojë në protestë. Në vend të podiumit para Kryeministrisë, ai ka zgjedhur një tjetër skenë politike, atë të vizitave zyrtare, ku ndodhet krah një prej figurave më të rëndësishme të mazhorancës.
Në këto kushte, mund të thuhet se Këlliçi po përpiqet ta luftojë mazhorancën nga brenda. Të paktën gjeografikisht. Sepse ndërsa protestuesit përballen me qeverinë në bulevard, deputeti demokrat gjendet në Holandë në të njëjtin delegacion me kryetarin socialist të Kuvendit, duke denoncuar patronazhistët nga një distancë e sigurt. Për momentin, beteja e tij me pushtetin duket se zhvillohet më afër Niko Peleshit sesa protestuesve që ai thotë se po mbron.
