Kryeministri Edi Rama ka reaguar sërish ndaj protestës që prej 18 ditësh po zhvillohet me kërkesën për dorëheqjen e tij dhe largimin e qeverisë.
Përmes një postimi në rrjetet sociale, kreu i qeverisë i ka cilësuar protestuesit si “ekstremistë që kërkojnë pushtetin duke filluar nga rruga”, ndërsa ka paralajmëruar për rreziqet që, sipas tij, sjell retorika e urrejtjes dhe intimidimi ndaj mendimit ndryshe.
Rama shkruan se historia ka treguar se lëvizjet ekstremiste synojnë të zëvendësojnë dialogun me presionin e turmës, duke përdorur frikësimin, linçimin publik dhe bullizmin si mjete për të imponuar qëndrimet e tyre.
Sipas kryeministrit, fenomeni është përforcuar nga rrjetet sociale, ku, sipas tij, kushdo që nuk pajtohet me mendimin e shumicës bëhet objekt fyerjesh, kërcënimesh dhe fushatash të organizuara damkosjeje.
Në reagimin e tij, Rama thekson se qëllimi i këtyre praktikave nuk është debati demokratik, por krijimi i një klime frike që i shtyn qytetarët të heshtin.
Duke iu referuar një videoje të publikuar nga qendra e Tiranës, kryeministri pretendon se sjelljet e shfaqura gjatë protestës përbëjnë një tjetër dëshmi të gjuhës së urrejtjes dhe të mungesës së qytetarisë demokratike në tubimin e organizuar kundër qeverisë.
