Këshilli i Përgjithshëm i Dhomës së Avokatisë së Shqipërisë do të mblidhet sot për të diskutuar lidhur me vendimin e Gjykatës së Apelit Administrativ që vendosi të pezullojë bojkotin e avokatëve. Mbrojtësit ligjorë për afro 2 muaj bojkotuan seancat gjyqësore në Gjykatën e Posaçme për shkak se kundërshtojnë rregulloren e këtij institucioni që sipas tyre i pengon të ushtrojë të drejtën e mbrojtjes.
Vendimi i Apelit Administrativ është automatikisht i zbatueshëm ndaj Këshilli i Përgjithshëm do të duhet ta shqyrtojë dhe të dalë me vendim. Dje në procesin ndaj ish-presidentit Ilir Meta dhe ish-politikanes Monika Kryemadhi avokatët nuk morën pjesë duke arsyetuar se nuk ishin njohur në rrugë ligjore me vendimin e Gjykatës.
Ndaj vendimmarrja e Këshillit është e domosdoshme, pasi nëse avokatët nuk zbatojnë vendimet e Dhomës së Avokatisë rrezikojnë masa disiplinore deri atë ekstreme heqje të licencës.
