Kuvendi ka kërkuar sërish nga Autoriteti i Konkurrencës nisjen e një hetimi në tregun e spitaleve private, pavarësisht se nga monitorimi i vitit të kaluar nuk u konstatuan raste abuzimi me çmimet, ndonëse një kompani rezulton me pozitë dominuese në këtë sektor.
Deputeti i PS, Erion Braçe, u shpreh se ekzistenca e një pozite dominuese është e qartë dhe e dokumentuar, por sipas tij Autoriteti i Konkurrencës nuk pranon ekzistencën e abuzimit me çmimet. “Ka pozitë dominuese, por jo abuzim me çmimet. Autoriteti i Konkurrencës ka pasur elemente të paqëndrueshme në argumentimin se nuk ka abuzime në treg”, deklaroi ai.
Në projektrezolutën e këtij viti është përfshirë gjithashtu kërkesa për hetim të kompanive në sektorin e hidrokarbureve. Braçe solli si shembull edhe periudhën para funksionimit të Bordit të Transparencës, duke theksuar se çmimet e karburanteve kanë qëndruar të pandryshuara për muaj të tërë, gjë që sipas tij përbën një arsye të fortë për hetim më të thelluar nga Autoriteti i Konkurrencës.
Në rekomandimet e komisionit për këtë institucion kërkohet gjithashtu monitorimi i shoqërive të sigurimit për marrëveshjet e shkëmbimit të informacionit mbi primet e sigurimit të mjeteve, si dhe mbikëqyrja e tregut të shërbimeve televizive me pagesë.
