Komisionerja për Zgjerimin e Bashkimit Europian, Marta Kos, deklaroi se projekti në zonën Pishë Poro–Nartë duhet të jetë plotësisht në përputhje me kuadrin ligjor dhe standardet europiane të mbrojtjes së mjedisit.
Në një prononcim për gazetarët në Bruksel, Kos theksoi se Shqipëria ka bërë përparim të rëndësishëm në fushën e mbrojtjes së mjedisit dhe se ky progres duhet të ruhet. Sipas saj, projekti do të vlerësohet në kuadër të detyrimeve që rrjedhin nga Kapitulli 27 i negociatave për anëtarësim në BE, i cili lidhet me mjedisin dhe ndryshimet klimatike.
Komisionerja bëri të ditur se autoritetet shqiptare kanë dhënë garanci se do të kryhet një vlerësim i plotë i ndikimit në mjedis. Ajo nënvizoi se procesi i anëtarësimit në Bashkimin Europian përbën garancinë më të fortë për mbrojtjen e natyrës dhe mjedisit sipas standardeve europiane, pasi i nënshtrohet monitorimit dhe vlerësimit të vazhdueshëm.
Duke komentuar reagimet publike ndaj projektit, Kos theksoi gjithashtu rëndësinë e së drejtës për të protestuar, duke e cilësuar atë një të drejtë themelore në Bashkimin Europian dhe duke shprehur kënaqësinë që kjo e drejtë po respektohet edhe në Shqipëri.
