Ministri i Drejtësisë, Toni Gogu, reagoi lidhur me deklaratat e deputetes socialiste Marjana Koçeku, e cila la të kuptohej se po përballej me kërcënime nga fisi Bajri.
Duke folur për mediat jashtë Parlamentit, Gogu tha se kur një deputet sinjalizon për një kërcënim, çështja nuk duhet parë si lajm politik, por si një çështje që i takon shtetit të së drejtës.
“Kur një deputet sinjalizon për një kërcënim, nuk është lajm politik. Besoj që ky është lajm që i takon shtetit të së drejtës dhe jam i bindur që të gjitha institucionet me pushtet për të luftuar krimin e organizuar, nëse është një rast i tillë, duhet të zbatojnë urgjentisht detyrat e tyre”, tha Gogu.
Ministri theksoi se çështja i takon organeve hetimore dhe ligjzbatuese, duke përmendur Policinë e Shtetit dhe SPAK-un, ndërsa shprehu edhe solidaritetin me deputeten socialiste.
“Kjo është një punë për organet hetimore dhe organet ligjzbatuese, si policia apo SPAK-u. Shpreh solidaritetin me kolegen time dhe meriton vëmendje shtetërore”, u shpreh ai.
