Kryetari i Partisë Demokratike, Sali Berisha, deklaroi për mediat jashtë Kuvendit se përpjekjet për heqjen e statusit të tij “non grata” në Shtetet e Bashkuara janë zhvilluar përmes procedurave të lobimit.
Berisha tha se nuk ka pasur lobim pranë administratës së ish-presidentit Joe Biden, por shtoi se pas ndryshimit të administratës amerikane, lobimi ka qenë rruga e vetme për trajtimin e çështjes së tij.
Sipas tij, masa e vetme e vendosur ndaj tij ka qenë ndalimi i vizës, ndërsa pretendoi se përpjekjet për ta përfshirë në sanksione të tjera nuk kanë rezultuar të suksesshme pas verifikimeve të kryera nga autoritetet amerikane.
I pyetur se kush e ka financuar lobimin për heqjen e statusit “non grata”, Berisha u shpreh se shpenzimet janë mbuluar nga një fondacion që, sipas tij, mbështet Partinë Demokratike dhe kauzat e saj politike.
Megjithatë, vlen të theksohet se pretendimi për heqjen e statusit “non grata” është bërë publik nga vetë Berisha, i cili ka deklaruar se ka komunikuar me përfaqësues të Ambasadës së SHBA-së në Tiranë. Deri më tani, autoritetet amerikane nuk kanë konfirmuar zyrtarisht një vendim të tillë, ndërsa nuk ka pasur asnjë reagim publik nga ambasada. Po ashtu, në njoftimin zyrtar të publikuar nga Departamenti Amerikan i Shtetit, Sali Berisha dhe familjarët e tij vijojnë të figurojnë si persona të shpallur “non grata”.
Ndërkohë, i pyetur nëse ka menduar largimin nga drejtimi i PD tashmë që pretendon se ka hequr sanksionimin e SHBA, Berisha e përjashtoi një mundësi të tillë. Ai akuzoi kryeministrin Edi Rama se ka bërë përpjekje për ta larguar nga skena politike, ndërsa theksoi se gëzon mbështetjen e anëtarësisë dhe elektoratit demokrat.
