Kreu i Grupit Parlamentar të Partisë Socialiste, Taulant Balla, ka deklaruar se nëse deputetja Marjana Koçeku është kërcënuar nga ndonjë person me precedentë kriminalë, ajo duhet ta denoncojë rastin në organet e rendit.
Në një prononcim për mediat jashtë Kuvendit, Balla theksoi se kërcënimi përbën vepër penale, ndërsa moskallëzimi i tij gjithashtu është i dënueshëm me ligj. Ai i bëri thirrje Prokurorisë së Shkodrës që të nisë një hetim paraprak mbi rastin, edhe nëse pretendimet nuk rezultojnë të vërteta.
“Kërcënimi është një vepër penale dhe moskallëzimi i një krimi është po ashtu vepër penale. Në rast se ka një person që guxon të kërcënojë një qytetar, pavarësisht pozicionit, është vepër penale. Mendoj që edhe sikur të mos jetë kështu, një hetim paraprak duhet zhvilluar”, u shpreh Balla.
I pyetur nga gazetarët nëse kishte komunikuar me deputeten, Balla përdori edhe ironi, duke u shprehur se në cilësinë e kryetarit të grupit është “bariu i tufës”, por se nuk kishte marrë një njoftim zyrtar apo të drejtpërdrejtë prej saj për shqetësimin në fjalë.
Ai shtoi se kishte qenë në kontakt me deputeten deri të premten, pasi ishin planifikuar të ishin pjesë e një delegacioni së bashku, por theksoi se çdo deputet ka vendimmarrjen e vet.
Balla komentoi gjithashtu përplasjet politike të deputetes Koçeku me mazhorancën, duke thënë se nuk është hera e parë që ndodh një gjë e tillë në politikën shqiptare, duke kujtuar raste të ngjashme të mëparshme mes Gazment Bardhit dhe Sali Berishës në vitin 2021, kur janë bërë akuza për takime me grupe kriminale në Elbasan.
