Kirurgu amerikan Adam Hamawy, i cili shkoi vullnetarisht në Gaza për të trajtuar viktimat e luftës, është zgjedhur anëtar i Dhomës së Përfaqësuesve të Kongresit amerikan. Kandidati demokrat fitoi zgjedhjet e 3 nëntorit në distriktin e 12-të të New Jersey-t, duke mundur kandidatin republikan Gregg Mele. Hamawy, me origjinë egjiptiane, bëhet myslimani i parë i zgjedhur në Kongres nga ky shtet amerikan.
Fitorja e tij ka një histori të veçantë. Në vitet 2024 dhe 2025, Hamawy udhëtoi drejt Gazës si kirurg vullnetar, ku trajtoi të plagosur në kushte të jashtëzakonshme, mes bombardimeve dhe krizës humanitare. Përvoja në Gaza u kthye në një nga arsyet kryesore që e shtynë të hynte në politikë.
“Shkova në Gaza si kirurg. U ktheva në shtëpi i vendosur të sigurohesha që njerëzit në pushtet të mos mund ta shpërfillnin më atë që kisha parë”, deklaroi ai për Muslim.com në qershor 2026.
Hamawy ka një përvojë mbi 30-vjeçare në misione humanitare dhe zona konfliktesh. Ai ka shërbyer si vullnetar në Haiti, Sudan, Siri dhe Liban, ndërsa më parë ka qenë kirurg ushtarak i ushtrisë amerikane gjatë luftës në Irak.
Në vitin 2004, ai ishte pjesë e ekipit mjekësor që shpëtoi jetën e Tammy Duckworth, sot senatore demokrate amerikane, pasi helikopteri i saj u godit gjatë luftës në Irak.
Gjatë fushatës elektorale, Hamawy kritikoi ashpër luftën në Gaza dhe mbështetjen ushtarake amerikane për Izraelin, duke kërkuar që Uashingtoni t’i japë përparësi financimit të kujdesit shëndetësor në vend të luftërave.
Me fitoren e 3 nëntorit, kirurgu që për vite me radhë ka trajtuar viktimat e konflikteve të armatosura do të ketë tashmë një vend në institucionin ku merren vendimet për politikën dhe financimet amerikane.
