Parlamenti i Grenlandës ka miratuar marrëveshjen e re të mbrojtjes me Shtetet e Bashkuara dhe Danimarkën, duke i hapur rrugën zgjerimit të pranisë ushtarake amerikane në ishullin strategjik të Arktikut. Marrëveshja u miratua me 16 vota pro, asnjë kundër dhe shtatë abstenime, pas debatit në parlamentin e territorit autonom danez. Tashmë dokumenti duhet të kalojë edhe në Parlamentin e Danimarkës, ku shqyrtimi pritet të nisë më 11 nëntor, ndërsa votimi përfundimtar është parashikuar më 19 nëntor.
Marrëveshja do të hyjë në fuqi vetëm pasi të përfundojnë procedurat parlamentare në të dyja vendet dhe Uashingtoni të njoftohet zyrtarisht për miratimin e saj. E nënshkruar më 22 shtator nga presidenti amerikan Donald Trump, kryeministrja daneze Mette Frederiksen dhe kryeministri i Grenlandës Jens-Frederik Nielsen, marrëveshja përditëson paktin e mbrojtjes të vitit 1951.
Ajo i jep SHBA-së mundësi të zgjerojë aktivitetet në bazën ushtarake Pituffik dhe të krijojë zona të reja mbrojtjeje në Narsarsuaq dhe Mestersvig. Dokumenti parashikon gjithashtu një rol më të madh të NATO-s në sigurinë e Arktikut dhe përfshin bashkëpunimin për sistemin amerikan të mbrojtjes raketore “Golden Dome”.
Në të njëjtën kohë, marrëveshja riafirmon sovranitetin e Danimarkës dhe të drejtën e popullit të Grenlandës për vetëvendosje. Miratimi vjen pas muajsh tensionesh të shkaktuara nga deklaratat e përsëritura të Trump, i cili ka kërkuar që SHBA-ja të marrë kontrollin ose pronësinë e ishullit, duke mos përjashtuar fillimisht as mundësinë e përdorimit të forcës. Për Uashingtonin, Grenlanda ka rëndësi të veçantë strategjike për shkak të pozicionit të saj në Arktik, interesave ushtarake dhe burimeve natyrore.
