Një 37-vjeçare shqiptare, e identifikuar si Mariela M., dyshohet se ka luajtur një rol të rëndësishëm në organizimin e një rrjeti prostitucioni në kryeqytetin francez, Paris. Hetimet e autoriteteve franceze kanë zbuluar një skemë të dyshuar të grumbullimit të të ardhurave nga prostitucioni dhe transferimit të tyre drejt Shqipërisë dhe Belgjikës.
Sipas gazetës franceze “Le Parisien”, shqiptarja ndodhet në paraburgim që prej 21 shkurtit 2026, nën akuzat për tutorim të rënduar, trafikim të qenieve njerëzore dhe pastrim parash në kuadër të një grupi të strukturuar kriminal.
Rrjeti dyshohet se ka vepruar gjatë periudhës 2023–2026 në zonën Porte de Vincennes, në Paris. Hetimet nisën pas dëshmisë së një gruaje rumune, e cila deklaroi se detyrohej t'u dorëzonte një pjesë të fitimeve dy grave, mes tyre edhe 37-vjeçares shqiptare.
Sipas hetuesve, Mariela M. kishte rol organizues në terren, duke mbikëqyrur aktivitetin e grave dhe duke grumbulluar një pjesë të të ardhurave. Përgjimet telefonike dhe vëzhgimet policore kanë ngritur dyshime se ajo koordinonte edhe lëvizjen e automjeteve që përdoreshin për takimet me klientët.
Në dosjen hetimore përmenden gjithashtu dy vëllezër shqiptarë, të identifikuar me inicialin Z., të cilët dyshohet se drejtonin aktivitetin nga Shqipëria. Njëri prej tyre, sipas autoriteteve franceze, vijonte të jepte udhëzime edhe nga burgu.
Hetimet financiare kanë zbuluar transferta parash jashtë Francës, ndërsa në Belgjikë dyshohet se vepronte një ndërmjetës i njohur me pseudonimin “Klaudi”, i cili merrej me grumbullimin e shumave të përfituara.
Nga gjurmimi i transaksioneve, autoritetet kanë përllogaritur rreth 128 mijë euro të lidhura me aktivitetin e 37-vjeçares. Vetë ajo ka deklaruar se fitonte nga 1 mijë deri në 2 mijë euro në javë nga ushtrimi i prostitucionit.
Mariela M. u arrestua më 17 shkurt 2026, së bashku me dy gra të tjera, në një hotel në Pantin, pranë Parisit. Gjatë kontrolleve, policia sekuestroi rreth 9 mijë euro para të gatshme.
Përpara autoriteteve, shqiptarja ka pranuar se ushtronte prostitucion, por ka mohuar se drejtonte rrjetin apo se grumbullonte dhe transferonte paratë e grave të tjera.
Avokati i saj ka kërkuar lirimin nën kontroll gjyqësor, ndërsa prokuroria franceze ka kundërshtuar kërkesën, duke argumentuar se ekziston rreziku i rikthimit në aktivitetin e dyshuar kriminal.
Hetimet vijojnë për identifikimin e plotë të personave të përfshirë dhe zbardhjen e rrugës së parave, ndërsa 37-vjeçarja mbetet e pafajshme deri në një vendim përfundimtar të drejtësisë.
