Policia greke, në bashkëpunim me Europolin, ka goditur një rrjet që dyshohet se organizoi kalimin e paligjshëm të mbi 500 emigrantëve nga Shqipëria drejt Greqisë. Në operacionin e zhvilluar në Selanik dhe në rajonin kufitar të Thesprotisë u arrestuan 10 persona, mes tyre një shqiptare 33-vjeçare, shtatë shtetas grekë dhe dy sirianë.
Sipas policisë greke, rrjeti vepronte të paktën që prej qershorit 2025 dhe kishte organizuar 41 kalime të paligjshme të kufirit. Emigrantët, kryesisht nga Nepali, Jemeni dhe Kina, kalonin në këmbë nëpër shtigje malore, siç tregojnë pamjet e regjistruara nga dronët e policisë.
Pasi kalonin kufirin, anëtarët e rrjetit i strehonin përkohësisht në banesa ose në çadra të improvizuara në Thesproti, ku u shisnin ushqime, ujë dhe karta telefoni me çmime të larta. Më pas i transportonin drejt Athinës, Patrës dhe zonave bujqësore të Peloponezit, ku shumë prej tyre përfundonin duke punuar pa dokumente të rregullta dhe pa sigurime.
Në disa raste, sipas hetuesve, anëtarët e rrjetit u mbanin emigrantëve pasaportat derisa këta të shlyenin me punë borxhin për transportin. Policia përllogarit se rrjeti përfitoi të paktën 750 mijë euro.
Gjatë operacionit u arrestuan gjithashtu 21 emigrantë pa dokumente të rregullta qëndrimi. Policia sekuestroi automjete, telefona, para dhe pasaporta. Hetimet vijojnë për të identifikuar persona të tjerë të përfshirë në rrjet.
