Mbi 10 tonë kokainë janë zbuluar në dy kapanone industriale në qytetin Águilas të Spanjës, pasi një paletë me drogë ra gjatë shkarkimit. Sipas mediave spanjolle, në qendër të hetimeve është një organizatë e dyshuar kriminale shqiptare. Vlera e ngarkesës në tregun e paligjshëm përllogaritet në mbi 100 milionë euro.
Zbulimi nisi në zonën industriale El Labradorcico. Kur paleta ra, një pjesë e ngarkesës u dëmtua dhe disa pako me kokainë u shpërndanë në dyshemenë e kapanonit. Punëtorët u larguan me shpejtësi, duke lënë pas edhe mjetin e punës. Një patrullë e Policisë Bashkiake mbërriti pas një njoftimi për një aksident të mundshëm në punë, por nuk gjeti askënd në vendngjarje.
Sipas raportimeve, në kapanonin e parë u gjetën më shumë se 5 tonë kokainë. Kontrollet çuan më pas në zbulimin e kapanonit të dytë, duke e çuar sasinë totale të sekuestruar në mbi 10 tonë. Dy ambientet dyshohet se përdoreshin për magazinimin dhe shpërndarjen e drogës në Spanjë dhe në vende të tjera të Evropës.
Në kutitë ku mbahej kokaina ishin shënuar adresat ku dyshohet se duhej të dërgoheshin ngarkesat. Hetuesit po i analizojnë ato për të përcaktuar destinacionet e drogës dhe për të identifikuar personat që organizonin shpërndarjen.
