Gjashtë punonjës të OSHEE-së kanë humbur jetën gjatë kryerjes së detyrës në dy vitet e fundit, sipas rasteve të identifikuara nga raportimet mediatike. Viktima e fundit është një elektricist rreth 50 vjeç, i cili humbi jetën këtë të premte në fshatin Kocul të Selenicës, pasi dyshohet se ra në kontakt me rrymën elektrike.
Sipas njoftimit paraprak të Policisë, rreth orës 10:45, shtetasi A. P., punonjës i OSHEE-së, ndodhej duke punuar në nënstacionin elektrik kur dyshohet se u godit nga energjia elektrike. Për pasojë, ai humbi jetën.
Grupi hetimor po punon për zbardhjen e rrethanave të aksidentit.
Por tragjedia në Selenicë nuk është një rast i izoluar. Të paktën pesë punonjës të tjerë të OSHEE-së kanë humbur jetën gjatë punës që prej prillit 2025.
14 prill 2025, Divjakë – Xhuljo Shtëmbari, 33 vjeç
Elektricisti humbi jetën gjatë riparimit të linjës së tensionit të mesëm Mërtish–Gradishtë. Sipas raportimeve, atij i ishte komunikuar se energjia elektrike ishte ndërprerë, por linja rezultoi ende nën tension.
Pas aksidentit, u arrestuan dy elektricistë, njëri i OST-së dhe tjetri i OSHEE-së, të dyshuar për shkelje të rregullave të sigurisë në punë.
8 maj 2025, Mirditë – Emiljano Bunga, 37 vjeç
Punonjësi i OSHEE-së humbi jetën në Kodër Rrëshen gjatë punimeve për furnizimin me energji elektrike të një qendre votimi, në prag të zgjedhjeve të 11 majit. Gjatë aksidentit u plagosën edhe dy elektricistë të tjerë, të moshave 60 dhe 58 vjeç.
19 shkurt 2026, Lezhë – Mark Prenga, 27 vjeç
Elektricisti humbi jetën në fshatin Rrilë, gjatë riparimit të një defekti në rrjetin elektrik. Sipas raportimeve, dyshohej se linja e tensionit të lartë prej 10 mijë voltësh nuk ishte stakuar.
Policia shoqëroi katër punonjës për t’u marrë në pyetje, përfshirë punonjës të OSHEE-së dhe përgjegjësin teknik. Hetimet u përqendruan te respektimi i protokolleve të sigurisë dhe ndërprerja e energjisë.
22 korrik 2026, Himarë – Bashkim Boçi, 54 vjeç
Punonjësi sezonal i OSHEE-së humbi jetën gjatë përpjekjeve për rikthimin e energjisë elektrike pas motit të keq në zonën e Potamit.
Sipas raportimeve, elektricisti ishte ngjitur në një shtyllë elektrike kur dyshohet se iu shkëput rripi i sigurisë dhe ra nga një lartësi prej rreth nëntë metrash. Shkaku përfundimtar i vdekjes nuk ishte përcaktuar në njoftimet fillestare.
12 shtator 2026, Belsh – Klajdi Zekthi, 32 vjeç
Elektricisti i OSHEE-së humbi jetën në fshatin Trojas, teksa po riparonte një linjë elektrike. Sipas Policisë, ai dyshohet se ra në kontakt me rrymën elektrike rreth orës 09:30.
Prokuroria nisi hetimet për zbardhjen e rrethanave të aksidentit.
6 nëntor 2026, Selenicë – A. P., rreth 50 vjeç
Punonjësi i OSHEE-së humbi jetën në fshatin Kocul, gjatë punës në nënstacionin elektrik. Dyshimet paraprake lidhen me kontaktin me energjinë elektrike.
Gjashtë jetë të humbura, një pyetje për OSHEE-në
Në disa prej këtyre aksidenteve janë ngritur dyshime për mosndërprerjen e energjisë elektrike, probleme në koordinimin e punimeve apo respektimin e masave të sigurisë.
Gjashtë viktimat përbëjnë bilancin minimal të rasteve të identifikuara në raportimet publike, jo një statistikë zyrtare përfundimtare të aksidenteve fatale në OSHEE.
Sa kontrolle ka kryer Inspektorati i Punës? Sa shkelje janë konstatuar? Çfarë masash ka marrë OSHEE pas aksidenteve të mëparshme dhe sa prej tyre kanë përfunduar me përgjegjësi konkrete?
Ndërsa hetimet për vdekjen e elektricistit në Selenicë sapo kanë nisur, mbetet ende pa një përgjigje publike të plotë pyetja se çfarë është bërë për të parandaluar përsëritjen e tragjedive në rrjetin elektrik.
