Ministria e Brendshme njofton se zyrat e kompanisë “IdentiTek” do të jenë të hapura edhe ditën e shtunë, më 10 maj, për të mundësuar qytetarëve tërheqjen e kartave të identitetit dhe ushtrimin e së drejtës së votës më 11 maj.
Ky vendim është marrë nga kompania “IdentiTek” me qëllim që t’u vijë në ndihmë qytetarëve që nuk kanë mundur të tërheqin dokumentet në kohë. Zyrat e aplikimit do të jenë të hapura nga ora 09:00 deri në orën 14:00, vetëm për tërheqjen e kartave të identitetit.
Ditët e fundit është vërejtur një fluks i shtuar aplikimesh nga qytetarë të cilëve u kanë skaduar dokumentet e identitetit, gjë që lidhet edhe me afërsinë e procesit të zgjedhjeve të përgjithshme.
Qeveria ka miratuar gjithashtu një Akt Normativ, i cili u jep të drejtë qytetarëve të votojnë edhe nëse dokumenti biometrik që zotërojnë është i skaduar. Këto masa synojnë të garantojnë mbarëvajtjen e procesit zgjedhor dhe të sigurojnë që çdo qytetar të ushtrojë të drejtën e votës pa pengesa.
