Katër muaj pas shpërthimit të skandalit me mbetjet e dyshuara toksike që u eksportuan nga Shqipëria drejt Tajlandës, anija me ngarkesën e kthyer mbrapsht ka mbërritur në Portin e Durrësit. Ngarkesa prej 102 kontejnerësh ndodhej në Singapor në momentin kur u dha alarmi se mbetjet ishin toksike, dhe kompania ndërkombëtare e transportit mori vendimin për kthimin në vendin tonë. Kontejnerët ishin të destinuar për në Tajlandë, por kompania eksportuese Sokolaj shpk nuk kishte marrë autorizim nga vendi pritës dhe dyshohet se analizat që shoqëronin ngarkesën janë të falsifikuara. Ngarkesa u ble nga kompania Sokolaj pranë kompanisë Kurum për shumën prej 41 mijë euro. Më vonë, Sokolaj ia shiti kompanisë simotër të regjistruar në Kroaci për vlerën 141 mijë euro. Prokuroria e Durrësit po heton prej 4 muajsh lidhur me skandalin e mbetjeve të dyshuara toksike, ku jo vetëm Kurum dhe Sokolaj janë të dyshuar, por edhe strukturat shtetërore përgjegjëse të cilat nuk morën masa dhe nuk kontrolluan ngarkesën. Kontejnerët do të hapen tashmë në prezencën e prokurorëve dhe do të merren mostra për analizimin e ngarkesës dhe krahasimin e dokumenteve të dorëzuara nga Sokolaj shpk në doganë, si dhe dokumentacionin shoqërues të ngarkesës.
