Seanca plenare e kësaj të enjteje në Kuvend është përfshirë nga tensione dhe përplasje, pasi deputetët e Partisë Demokratike kanë bllokuar foltoren, kanë ndezur flakadanë dhe kanë hedhur sende në drejtim të kryeministrit Edi Rama.
Ndërsa kryetari i Kuvendit, Niko Peleshi, vijonte leximin e projektligjeve të rendit të ditës, deputetët socialistë kanë ngritur kartonët për miratimin e tyre, në një atmosferë të tensionuar dhe mes protestës së opozitës.
Salla e parlamentit është mbuluar nga tymi blu i flakadanëve të ndezur nga deputetët demokratë, të cilët mbanin në duar edhe pankarta kundër dhunës policore ndaj studentëve. Në shenjë revolte, ligjvënësit opozitarë kanë goditur vazhdimisht tavolinat, duke kundërshtuar vijimin e punimeve.
Tensionet nisën që në hapje të seancës, kur deputetët e PD-së bllokuan foltoren, duke detyruar kryeparlamentarin Peleshi të ndërpriste përkohësisht punimet.
Megjithatë, edhe pas rifillimit të seancës, situata mbeti e pandryshuar. Deputetët e opozitës vijuan bllokimin e foltores dhe protestën brenda sallës, ndërsa Peleshi i ndërpreu të drejtën e fjalës kryetarit të PD-së, Sali Berisha, si dhe përjashtoi katër deputetë demokratë nga seanca.
Pavarësisht kundërshtimeve dhe tensioneve, mazhoranca socialiste vijoi procedurat parlamentare, duke miratuar projektligjet e rendit të ditës mes tymit dhe protestës së opozitës.
