Presidenti i Partisë së Lirisë, Ilir Meta, ka reaguar nga burgu pas vendimit të SPAK që e ka marrë të pandehur. Në një komunikim të drejtpërdrejtë me gazetarët përmes avokatit të tij, Meta u shpreh se mezi pret të përballet në sallën e gjyqit.
“Mezi po pres të jem në sallën e gjyqit, ku do të jeni edhe ju, gazetarët ndërkombëtarë, për të parë faktet dhe provat për këtë organizatë që i shërben Ramës,” tha Meta, duke shtuar se “nuk do të ketë kurrë kërkesë nga Ilir Meta për mbylljen e procedurës”.
Ai theksoi se ky do të jetë një proces që do të fitohet, ashtu siç ka fituar të gjitha proceset hetimore më parë. Meta u shpreh gjithashtu se askush nuk është paraqitur për ta shoqëruar në Prokurori dhe se avokati i tij po humb kohë kot.
“Mezi po pres të shkoj, që t’i uroj për 83 mandatet që i dhanë me taksforcën e tyre kundër opozitës dhe po ashtu edhe për mosveprimin kundër ‘terroristëve elektoralë’, Edi Ramës,” tha Meta, duke akuzuar ata për përfshirje në krime elektorale dhe lidhje me inceneratorët.
Meta e cilësoi vendimin si produkt i një votimi antikushtetues me 69 vota të prokurorit të përgjithshëm dhe rikujtoi se nuk do të kërkojë mbylljen e procedurës, duke paralajmëruar fitore në procesin gjyqësor.
