Armis Stafa, 36 vjeç, u arrestua në Dubai si pjesë e operacionit ndërkombëtar “The Wanted”, pas shkëmbimit të informacionit mes Policisë së Shtetit dhe Interpol Tiranës. Ai akuzohet nga GJKKO për pastrim parash në bashkëpunim me vëllezërit F.G. dhe H.B., përmes shitblerjes së automjeteve, në kuadër të një grupi kriminal në Elbasan. Stafa rezulton i lidhur edhe me organizatën kriminale të Franc dhe Hajdar Çopjas, dhe po pritet ekstradimi i tij në Shqipëri.
Njoftimi
Policia e Shtetit/Vijon operacioni policor ndërkombëtar, i koduar “The Wanted”.
Akuzohet nga GjKKO-ja, se pastroi paratë e një grupi kriminal në Elbasan, nëpërmjet shitblerjes së automjeteve, kapet në Dubai, 36-vjeçari.
Si rezultat i shkëmbimit në kohë reale të informacionit të siguruar nga struktura të specializuara të Policisë së Shtetit, me homologët në Emiratet e Bashkuara Arabe, nëpërmjet shërbimeve të Interpol Tiranës, gjatë kësaj faze të operacionit “The Wanted”, u kap në Dubai, me qëllim ekstradimin në Shqipëri, shtetasi A. S. alias A. S., 36 vjeç, i lindur në Elbasan.
Gjykata e Posaçme e Shkallës së Parë për Korrupsionin dhe Krimin e Organizuar, në vitin 2024, i ka caktuar këtij shtetasi, masën e sigurisë “Arrest në burg”, për veprën penale “Pastrimi i produkteve të veprës penale ose veprimtarisë kriminale”, kryer në bashkëpunim.
Ky shtetas akuzohet në kuadër të një procedimi penal të vitit 2022, se në bashkëpunim me të tjerë, ka pastruar nëpërmjet shitblerjes së automjeteve, paratë e shtetasve F. G. alias F. Ç. dhe H. B. alias H. Ç. (vëllezër), të përfituara nga veprimtari kriminale.
Interpol Tirana vijon bashkëpunimin me homologët në Abu Dhabi, për të finalizuar procedurën për ekstradimin e këtij shtetasi, në Shqipëri.
