Në seancën e sotme për çështjen e njohur si “Sterilizimi”, ish-ministri i Shëndetësisë, Ilir Beqaj, deklaroi se: “Sa i takon komunikimit publik, kjo nuk është çështja e Sterilizimit, as kontratë e Sterilizimit dhe as koncesion i Sterilizimit. Kjo nuk përmendet as në titullin e kontratës. Sterilizimi është vetëm një nga 6 komponentët e kontratës. Kjo është çështje e instrumenteve kirurgjikale.”
Beqaj shprehu shqetësime edhe për formulimin e dosjes: “I referohen dosjes ‘Ilir Beqaj dhe të tjerët’. Unë jam i fundit në kërkesën e gjykatës. Pse duhet të thuhet ‘Ilir Beqaj dhe të tjerët’? Këta të tjerët i bie sikur janë këtu prej meje. Unë synoj pafajësinë dhe kjo është nominale.”
Ai kritikoi edhe procedurat lidhur me caktimin e mbrojtjes ligjore: “E kam për avokatin Maks Haxhia, si drejtues të dhomës së avokatisë. Avokati kryesisht i caktuar nga gjykata për dy javë tha se është i gatshëm për mbrojtjen, pa e lexuar dhe pa më takuar mua ndonjëherë. Unë i kam parë edhe komentet e Haxhiajt për SPAK-un. Do të doja të informohem nga gjykata, kur ka ardhur avokati kryesisht të njihet me dosjen time?”
Më tej, ai u shpreh për vendimin e datës 23 janar 2025: “Përmban të dhëna dhe informacione të rreme. Procedimi ndaj meje nuk duhet të kishte nisur, pasi i njëjti fakt penal është hetuar nga Prokuroria e Tiranës dhe ajo prokurori e ka pushuar çështjen.”
Në përfundim, Beqaj ngriti shqetësimin për përfshirjen e nenit penal për armëmbajtjen pa leje: “Në vendimin e gjyqtares paraprake përmendet 15 herë neni i kodit penal, që flet për armëmbajtjen pa leje. Se ç’lidhje kam unë me këtë, nuk e di.”
Seanca për çështjen “Sterilizimi” vijon, ndërsa Beqaj kërkon të sqarojë pozicionin e tij përpara drejtësisë.
