Një shtetas pakistanez është mashtruar nga dy të rinj duke i thënë se do ta transportonin me automjet në drejtim të Shkodrës, me qëllim kalimin ilegalisht të kufirit për në Mal të Zi.
21-vjeçari Nazo Sulaj dhe 26-vjeçari Elvis Çobo, e kanë dhunuar refugjatin i morën lekët që pakistanezi kishte me vete dhe e zbritën në Fier.
Pakistanezi ka marrë asistencë mjekësore dhe është jashtë rrezikut për jetën, ndërsa dy të rinjtë janë arrestuar.
Shërbimet e Policisë pas marrjes së njoftimit nga spitali rajonal i Fierit, se emigranti ishte paraqitur për mjekim, kanë zbardhur dinamikën e ngjarjes duke vendosur në pranga dy të rinjtë.
“Këta 2 shtetas dyshohet se kanë marrë në automjet nga Gjirokastra, 1 emigrant nga Pakistani duke e mashtruar se do ta transportonin në Shkodër, për të kaluar ilegalisht kufirin me Malin e Zi. Më pas ata e dhunuan, i morën paratë dhe e zbritën në rrugë në Fier”, njoftimi i policisë.
Ndërkohë janë sekuestruar në cilësinë e provës materiale eurot që i morën me dhunë emigrantit, dy celularë dhe automjeti me të cilin lëviznin dy të rinjtë e arrestuar.
