Arrestohet Ergys Agasi, një nga emrat kryesorë të dosjes së AKSHI-t dhe i shpallur në kërkim nga SPAK prej dhjetorit të vitit të kaluar.
Burime për VNA bëjnë me dije se Agasi është ndaluar nga policia në afërsi të Durrësit. Sipas të njëjtave burime, forcat e rendit e kanë pikasur fillimisht në zonën e Elbasanit dhe më pas e kanë ndjekur deri në momentin e ndalimit.
Bashkë me Agasin është ndaluar edhe Uljan Shpataraku, ish-drejtues në Policinë e Shtetit, i njohur si një nga njerëzit më të afërt të ish-drejtorit të Përgjithshëm të Policisë, Ilir Proda.
Shpataraku ishte shpallur në kërkim nga Policia e Himarës më 6 gusht 2026, pas një kallëzimi nga punonjësit e një hoteli në Dhërmi, të cilët pretenduan se ishin kanosur dhe kërcënuar prej tij pas një konflikti verbal.
Ende nuk dihen rrethanat e plota të ndalimit të tij bashkë me Agasin, si dhe nëse Shpataraku ka pasur rol në lëvizjen apo shoqërimin e biznesmenit të kërkuar nga SPAK.
Agasi ishte shpallur në kërkim më 16 dhjetor 2025, në kuadër të hetimeve për tenderat e AKSHI-t. Ai dyshohet për përfshirje në një skemë të manipulimit të prokurimeve publike, ku në hetim janë përfshirë ish-drejtues të AKSHI-t, biznesmenë dhe persona të tjerë të lidhur me procedurat e tenderimit.
SPAK ka ngritur ndaj tij dyshime për vepra të rënda penale, mes tyre konkurrencë të paligjshme nëpërmjet dhunës, shkelje të barazisë së pjesëmarrësve në tendera apo ankande publike dhe heqje të paligjshme të lirisë.
Ndërkohë kanë dalë në dritë detaje nga arrestimi u Ergys Agasit, i shumëkërkuari i SPAK. Sipas burimeve të besuara ai është vëzhguar për dy javë me radhë në Elbasan e Durrës derisa u ndalua tek Plepat në shoqërinë e Ulian Shpatarakut, ish-zyrtar policie. Në makinën me të cilën udhëtonin janë gjetur dhe çanta brenda të cilave nuk dihet çfarë ka, por po kontrollohen nga policia. Për arrestimin e tij ende nuk ka një reagim zyrtar, por pasi të përfundojë aksioni do të ketë reagim. Ergys Agasi dhe Ulian Shpataraku janë dërguar në drejtorinë e Policisë së Tiranës.
