Detaje të reja janë zbardhur nga autoritetet greke për ngjarjen e rëndë të ndodhur në Rodopi, ku 44-vjeçarja shqiptare Esma Meço humbi jetën pasi u godit me thikë brenda banesës së saj.
Sipas njoftimit zyrtar të Policisë Helenike, bashkëshorti i viktimës, Bujar Meço, 53 vjeç, me origjinë nga Gramshi, është arrestuar si i dyshuar për vrasjen.
Ngjarja u zbulua mesditën e 26 gushtit, kur një i afërm gjeti Esma Meçon brenda banesës, të plagosur rëndë me një mjet të mprehtë. 44-vjeçarja u transportua me urgjencë në Spitalin e Komotinit, por nuk mundi t'u mbijetonte plagëve të marra.
Nga hetimet paraprake, policia dyshon se 53-vjeçari ka goditur me thikë bashkëshorten dhe më pas ka plagosur veten.
Bujar Meço u transportua me ambulancë në spital, ku po merr trajtim mjekësor nën mbikëqyrjen e policisë.
Gjatë këqyrjes së banesës, autoritetet sekuestruan dy thika, të cilat pritet t'i nënshtrohen ekspertizës në kuadër të hetimeve për zbardhjen e plotë të krimit.
