Një mësues i një shkolle 9-vjeçare në qytetin e Korçës u arrestua të mërkurën pasi akuzohet se ka ngacmuar seksualisht dy prej nxënësve të tij 14-vjeçare. “Komisariati i Policisë Korçë arrestoi në flagrancë shtetasin B. D., 45 vjeç, banues në Korçë, me detyrë mësues në një shkollë 9-vjeçare, pasi dyshohet se ka ngacmuar seksualisht dy nxënëse, nëpërmjet aplikacionit “WhatsApp”“, njofton policia. Ngacmimi seksual, i kryer kundër të rriturve apo të miturve, është një vepër penale që dënohet me burgim nga tre deri në shtatë vjet. Të dhënat e siguruara nga BIRN nëpërmjet një kërkese për informim nga Policia e Shtetit tregojnë se vetëm gjatë 12 mujorit të fundit, 124 gra dhe vajza janë prekur nga vepra penale të kryera në hapësirën digjitale, të tilla si “përndjekja” apo “mashtrimet kompjuterike”. Lidhur me rastin e mësuesit, policia njoftoi se në cilësinë e provës materiale u sekuestruan celularët e shtetasve, teksa materialet i kanë kaluar prokurorisë së rrethit.
BIRN
