Sot, Pallati i Kongreseve në Tiranë hap dyert për Panairin e 27-të të Librit, një ngjarje e rëndësishme kulturore që pritet me shumë interes nga dashamirësit e leximit në mbarë vendin. Ky panair mbarëkombëtar do të ofrojë një program të pasur me ekspozime librash, prezantime, takime me autorë vendas dhe të huaj, promovime botimesh të reja, ndarje çmimesh, konferenca, dhe shumë të tjera.
Motoja e këtij viti, “Të lexosh do të thotë: të jetosh, të zbulosh, të rritesh”, synon të frymëzojë dashurinë për leximin dhe eksplorimin intelektual.
Panairi organizohet nën mbështetjen e Qendrës Kombëtare të Librit dhe Leximit dhe Ministrisë së Ekonomisë, Kulturës dhe Inovacionit, dhe do të vijojë deri më 17 nëntor, duke ofruar mundësinë që lexuesit të njihen me botimet më të fundit dhe të marrin pjesë në një festë të vërtetë të kulturës së librit.
