Zjarret e përhapura në ditët e fundit kanë shkatërruar një sipërfaqe të konsiderueshme në Liqenin e Prespës së Vogël, një zonë që tani është gati e tëra e mbushur me kallamishte dhe kënetë. Sipas informacionit të autoriteteve, flakët kanë djegur rreth 40 hektarë, duke nisur nga Shpella e Trenit dhe duke u shtrirë deri në afërsi të kufirit me Greqinë.
Ekspertët e mjedisit tërheqin vëmendjen se zjarret e shpeshta në këtë zonë kanë shkaktuar dëme të pallogaritshme në ekosistemin e liqenit. Në rrezik janë habitati i pelikanit kaçurrel, si dhe shumë shpendë dhe specie të tjera që jetojnë në këtë ambient.
Një nga shkaqet e zjarreve është djegia e qëllimshme e kallamishtes nga banorët e fshatrave përreth, të cilët e bëjnë këtë për të shndërruar tokën e kënetës në tokë bujqësore. Kjo ka çuar në një rritje të numrit të zjarreve që shpërthejnë çdo vit, ndërkohë që ndërhyrja e Shërbimit zjarrfikës është e kufizuar, për shkak të terrenit të vështirë dhe ndodhisë e zjarreve në brendësi të liqenit. Kjo ka bërë që flakët të vazhdojnë për ditë të tëra, duke rritur pasojat në mjedisin lokal.
