Një vatër e madhe zjarri është regjistruar mesditën e së mërkurës, rreth orës 12:50, në një sipërfaqe me shkurre, ferra dhe bimësi të egër përgjatë lumit Shkumbin, pranë fushës së grumbullimit të mbetjeve dhe inceneratorit të Elbasanit. Flakët janë përhapur me shpejtësi, duke krijuar shtëllunga të mëdha tymi të dukshme edhe nga distanca të largëta.
Situata është përkeqësuar gjatë orëve të fundit, pasi zjarri vijon të jetë aktiv dhe po i afrohet zonës së depozitimit të mbetjeve, duke rritur ndjeshëm rrezikun për përfshirjen e saj nga flakët.
Forcat zjarrfikëse ndodhen në terren dhe po punojnë pa ndërprerje për të izoluar vatrat dhe për të ndalur përhapjen e mëtejshme të zjarrit. Megjithatë, temperaturat e larta dhe kushtet atmosferike në zonë po e vështirësojnë ndërhyrjen.
Për menaxhimin e situatës emergjente janë vënë në përdorim edhe sistemet hidrante të Landfillit të Elbasanit, të cilat po shërbejnë për furnizimin me ujë të mjeteve zjarrfikëse.
Autoritetet po e monitorojnë nga afër zhvillimin e situatës, ndërsa prioritet mbetet mbrojtja e fushës së mbetjeve dhe shmangia e një emergjence më të madhe mjedisore.
Qytetarëve u bëhet thirrje të shmangin lëvizjet në zonën e prekur deri në normalizimin e plotë të situatës.
