Një tjetër rast i dyshuar i pastrimit të parave të përfituara nga trafiku ndërkombëtar i drogës ka dalë në dritë në Shqipëri, pas operacionit të zhvilluar nga SPAK.
Në kuadër të këtij hetimi, Gjykata e Posaçme ka caktuar masën e sigurisë "arrest në burg" për 10 persona të dyshuar si pjesë e një grupi të strukturuar kriminal të përfshirë në trafik ndërkombëtar të lëndëve narkotike dhe pastrim parash.
Sipas hetimeve, një pjesë e të ardhurave të krijuara nga trafiku i kokainës është futur në Shqipëri në formë cash dhe më pas është investuar në pasuri të paluajtshme dhe kompani që operojnë kryesisht në sektorin e ndërtimit dhe hotelerisë.
Mes personave për të cilët është lëshuar urdhër arresti është edhe Isa Aliu. Sipas të dhënave të bëra publike, përmes kompanive të lidhura me të, Aliu ka përfituar leje për ndërtimin e resorteve turistike në zona të ndryshme të bregdetit shqiptar, nga Gjiri i Lalzit deri në jug të vendit. SPAK dyshon se një prej kompanive të përdorura për pastrimin e parave është "Aliu Road House" sh.p.k.
Pjesë e hetimit janë edhe vëllezërit Bibaj, të cilët zotërojnë një sërë pronash dhe kompani ndërtimi. Ata rezultojnë të kenë investime në sektorin e turizmit dhe hotelerisë, përfshirë një hotel në Dhërmi, si edhe hotelin "Elisa Tirana", i afiluar me markën ndërkombëtare Melia.
Ky është një tjetër rast se si kapitalet e dyshuara me origjinë kriminale mund të depërtojnë në ekonominë shqiptare, përmes investimeve në ndërtim dhe turizëm, sektorë ku subjektet nën hetim kanë arritur të sigurojnë edhe leje zhvillimi nga institucionet shtetërore.
