- Autoriteti i Dosjeve pohon: S'ka interes për verifikimin e kandidatëve nëse kanë dosje tek ish Sigurimi Shtetit.
"Ka një lloj hipokrizie për verifikimin e kandidatëve lidhur me të kaluarën e tyre në ish-Sigurimin e Shtetit.”-pohon Kryetarja e AIDSSH, Genta Sula.
AIDSSH është gati të verifikojë kandidatët për zgjedhjet e 11 majit, por Znj. Sula thekson: “Ne vihemi në lëvizje vetëm pas kërkesës së partive politike. Pa këtë, procesi nuk mund të nisë.”
Ajo kujtoi se edhe vetëdeklarimi i kandidatëve, i propozuar gjatë Reformës Zgjedhore, është anashkaluar pa debat.
Listat
Partitë politike duhet të dorëzojnë listat e kandidatëve dhe vetë kandidatët duhet të japin detaje si gjeneralitetet dhe vendet e punës për një verifikim të saktë.
“Me 40 subjekte politike dhe mbi 140 kandidatë, procesi bëhet i komplikuar. Ne duhet të përdorim çdo burim të mundshëm, përfshirë edhe kërkesat nga media,” tha Sula.
Të dhënat
Të dhëna shqetësuese nga e kaluara
Autoriteti ka zbuluar përfshirje serioze të ish-anëtarëve të Sigurimit në Kuvendin e parë të pas-komunizmit. Sula e krahasoi situatën me Gjermaninë, ku të tillë persona nuk u toleruan në proceset demokratike.
Lind pyetja: A janë penguar proceset demokratike në Shqipëri nga të njëjtët njerëz?
