Diaspora shqiptare është duke shfaqur një interes të madh për të marrë pjesë në zgjedhjet parlamentare të 11 majit 2025, duke mundësuar për herë të parë votimin pa u kthyer fizikisht në Shqipëri.
Deri tani janë regjistruar mbi 65 mijë kërkesa, nga të cilat rreth 41 mijë janë miratuar nga Komisioni Qendror i Zgjedhjeve (KQZ). Shtetet me numrin më të madh të kërkesave përfshijnë Italinë, Greqinë, Shtetet e Bashkuara dhe vendet e Bashkimit Europian. Interes të madh kanë shfaqur edhe shqiptarët që jetojnë në shtete të tjera si Kanadaja, Australia, dhe disa ishuj të largët, përfshirë Anguilas në Karaibe, që ka regjistruar 49 aplikime.
Sa i përket kontinentit afrikan aplikime janë marrë nga Algjeria, Afrika e Jugut, Angola, Zambia, Kongo e Gaboni. Një tjetër kontinent ku interesi i shfaqur, edhe pse në nivele thuajse të papërfillshme, ka qenë ekzistent është Amerika Latine. Shqiptarët që kanë aplikuar për të votuar ndodhen në shtete si Kolumbia, Argjentina, Brazili dhe Kili.
Vende të tjera që mund të përmenden, nga ku shqiptarët kanë shfaqur interes zgjedhor janë India, Kazakistani, Taxhikistani, Tajlanda, Bangladeshi, Mongolia, Vietnami, Filipinet apo Madagaskari. Aplikimet për votuesit nga diaspora do të jenë të hapura deri më datën 4 mars 2025, dhe secili që refuzohet, deri në këtë datë, ka të drejtë ta provojë përsëri.
