Kryetari i Partisë Demokratike, Sali Berisha, ka deklaruar se në rast të rikthimit të Donald Trump si President i Shteteve të Bashkuara të Amerikës, do të ndërmarrë përpjekje për anulimin e vendimit që e shpall atë “non grata”.
Berisha e cilësoi këtë vendim si një akt të korruptuar, të ndikuar nga lobimi i kryeministrit Edi Rama, me qëllim eliminimin e opozitës dhe centralizimin e pushtetit në Shqipëri.
“Padiskutim do të bëj përpjekjet e mia për anulimin e një vendimi korruptiv të bazuar në lobimin e Edi Ramës. Ky vendim kishte për qëllim likuidimin e opozitës dhe dorëzimin e të gjitha pushteteve te Edi Rama,” tha Berisha.
Ai shtoi se para se të ndërmarrë hapa konkretë, do të konsultohet me juristë për të përcaktuar rrugën më të përshtatshme ligjore.
Berisha vlerësoi disa prej vendimeve të marra gjatë administratës Trump, duke theksuar qëndrimet e tij kundër korrupsionit dhe përdorimit të fondeve publike për të dëmtuar opozitat konservatore në botë.
“Kam përshëndetur vendimet e marra nga Donald Trump për të mos lejuar përdorimin e parave të taksapaguesve amerikanë kundër opozitave konservatore dhe për të luftuar drejtësinë e korruptuar politike në SHBA dhe vende aleate,” theksoi ai.
