Ish-kryeministri Sali Berisha ka paralajmëruar protesta të fuqishme para ambasadave shqiptare në mbarë botën, nëse emigrantëve pa dokumente shqiptare nuk u njihet e drejta e votës në zgjedhjet e 11 majit.
Berisha kërkoi që Kuvendi të miratojë një amendament që u lejon emigrantëve përdorimin e çdo dokumenti biometrik të vendit ku jetojnë për të votuar. Ai theksoi se në rast të mosmiratimit të këtij amendamenti, Partia Demokratike do të kushtëzojë ndryshimet në Kodin Zgjedhor.
Duke bërë thirrje për veprime konkrete, Berisha u shpreh:
“Ftoj KQZ-në të ndërmarrë hapa zyrtarë dhe të respektojë vendimin e Gjykatës Kushtetuese, pasi ky është një detyrim madhor. Përndryshe, do të organizojmë protesta të fuqishme para ambasadave shqiptare, por edhe më gjerë.”
Ai i cilësoi institucionet shqiptare si përfaqësuese të një “narkoshteti”, duke akuzuar qeverinë për përpjekje për t’i mohuar emigrantëve të drejtën e votës. Sipas Berishës, përjashtimi i tyre nga procesi zgjedhor është një padrejtësi që prek mbi 1 milion shqiptarë jashtë vendit.
Berisha paralajmëroi nisjen e një lëvizjeje globale të mosbindjes civile për të kundërshtuar regjimin aktual, duke theksuar se frika e qeverisë ndaj votës së emigracionit është një shkelje e rëndë e të drejtave demokratike.
